2024-02-19, 12:15 pm
من طرف 
افتكرت لما حبيتك اني امتلكت الحياه
كنت زي عصفور يرفرف على جناح الامل
يوصل هناك فوق بعيد لمنتهاه
كل شيء النهارده تاه
في زحمة المدن
في غربة مشتاقه تنام على سرير الحزن وتحتضر
مشتاقه تطفي نور الشمس وللنهار تختصر
كنت فاكر ان حبنا هيعيش ليوم الممات
رغم السكات
كل شيء النهارده مات
مكنتش اعرف انه حب هش
حب قش
حب اضعف من انه يعيش
حب من طرف واحد
مربوط في حبل دايب متحملنيش
مكنتش اعرف ان النهايه اتسطرت
اتحضرت
كنت بتحمل كتير ومهمنيش
كنت بشرب من سم الكلام
كاسات مرار اشربها جوه قلبي وانام
ولما يوجعني الكلام
كنت اعتذر واقول سلام
مش ضعف مني
ولا اني عاجز لكني
كنت عايز يفضل الحب ينتصر
لا يهزه ريح ولا ينكسر
رغم الجفا
وكلام غبي في لحظة غضب
عمرك ما قلتي مره متأسفه
فاكراني ايه ربي خلقني من حجر
ولا مجرد غصن من فرع انكسر
رماه هنا جزع الشجر
انا بشر
ربي خلقني من ميه وطين
لما اتولدت لقتني حر مش سجين
وكرامتي عندي هيه حياتي
اموت ولا تتهانش يوم يا حياتي
من يوم ميلادي
ليوم وفاتي
منكرش ابدا انك انتي حبيبتي
وعارف انك بتكرهيني
وبتكرهي اسمي وسيرتي
وعمري ما كنت فيوم حبيبك
اصل اللي بيحب ميعرفش يجرح
ولا يقول للي يحبه انا عايزه اسيبك
ومش طايقه وجودك
خلاص يا عمري هترتاحي مني
لا هسألك عملتي ايه ولا ايه فضلي
اتفضلي عيشي حياتك
ومش مهم مين اللي اتظلم
ولا مين ظلمني
كل اللي بينا انتهى من غير وداع
ومش مهم مين اشترى
ولا مين اللي باع
كل اللي اقدر اعمله كلمة وداع
وسبيني اخد حبك معايا في السفر
حبي اللي مات وانكسر
مع قلب عمره ما عرف ازاي يحب
ولا عن غلطته فيوم اعتذر
samir
