عارفه يامه
كل ليله بتمري بخيالي
لما اكون صاحي
او حتى فمنامي
حاسس ان الموت مخدش منك
غير طرحتك وجلابيتك السوده
وكل اما اعدي جمب الاوضه
اسمع دعاكي
وانتي بتدعي ربنا يوفقني فحياتي
ايوه بسمعك يا غاليه ليلاتي
عارفه يامه
انا عارف انك زعلانه مني
عشان بقالي كتير مشيلك حزني وهمي
ومش باجي ازورك
والله يامه غصب عني
مانتي عارفه اني عايش في غربه
ومتصدقيش لو قالولك
اني نسيتك
او نسيت ضي نورك
دانتي روحي يا غاليه انتي
حتى لو فرقنا موتك
عارفه يامه
ابنك كبر وقلبه دق
البت كتير تشبهك وقلبي رق
كنت نفسي تكوني لسه جنبي
كنت عارف انك هتقوليلي
والله يابني عندك حق
البت حلوه وتستاهل تشغلك
بس اوعى تنسيك امك
وعني تهملك
خليك دايما فاكرني
وبالعقل ربي يكملك
ويحفظك ويسلمك
عارفه يامه
كل اما اشتاقلك اعدي جمب الاوضه
علشان اسمع ضحكتك
واستخبى تحت طرحتك
وجلابيتك السوده
Samir