2024-02-19, 12:15 pm
من طرف 
الرباعيات
( 1 )
اشطبي اسمي من جدول الايام
احذفي حروف الصمت والكلام
انسي اني كنت في يوم هنا
ليه عايزه تتعبيني والله حرام
( 2 )
كل شيء بعدك ملوش اي طعم
الاصابه جت ف قلبي والف سهم
اعملي حفلة علي جثة حبيبك
ووزعي بايدك للديابه اللحم
( 3 )
نفسي اكتب كلام ف الحب والغرام
عايز اكون حلم عاشق ف المنام
اطلع قمر واحصد نجوم م السما
نفسي يا حبيبتي اكون وعجز الكلام
( 4 )
النهارده عايز اقولك كلمه حلوه
اكتب قصيده ولحن والف غنوه
اعذريني مش قادر حبيبتي
هربت حروفي ومعني كل كلمه
( 5 )
سافري جوه نبضي وعروقي
ادخلي قلبي ونامي بين ضلوعي
تسوى ايه الدنيا من غير وجودك
وانتي شمس العمر ووجودك ربيعي
( 6 )
عارفه حبيبتي ان الوحده عذبتني
خدت كل فرح يومي وسبتني
ولما حبيت اعاتب او اقول
زرعت جوايا الهموم وغرقتني
( 7 )
كل شيء ماسخ ومر
حاسس ان العمر مر
والحياة مسافره للممات
والجنازه من بابك تمر
( 8 )
ادفنيني جوه قبر قلبك
عايز اكون دايما بقربك
والملايكه لما تحاسبني
ادخل جنتك وافضل احبك
( 9 )
نفسي ابطل شعر وكتابه
الحرف كاسه مر وشرابه
اعمل ايه حد يساعدني
تعبت م الحلم وسرابه
( 10 )
خايف اتوه ف دوامه واضيع
محدش عايز يشتري كله يبيع
وسوق الحياه فاتح مزاده
من فصل الشتا لحد الربيع
( 11 )
خدي مني كل عمري وسنيني
واحلفي انك في يوم ما تسبيني
توعديني ولا الوعد صعب
تعرفي تشقي في يوم وتسعديني
( 12 )
جمعه مباركه علي الجميع
اللهم تقبل وبحق نبيك الشفيع
راعي ضميرك يا ابن آدم
قبل ما العمر يسرقك وتضيع
( 13 )
ازرعي في ارضي الحياه
اعصري عطرها واسقيني صفاه
كل لحظة عمر بتمر في عمري
يا حبيبتي من غير وجودك وفاه
( 14 )
وقف نزيف الكلام
تعبان ومحتاج انام
تصبحوا علي الف خير
بهديكم مليون سلام
( 15 )
الكلام مات وحروف الكتابه
حتي عقلي كل افكاره كآبه
البوم الصور مليان ذكريات
اجمل ما فيها لونه اسود هبابا
( 16 )
الحياة اتبنت علي ايد في ايد
ايد تهد وايد تبني من جديد
والطريق مهما يطول
لازم هنوصل للفجر الوليد
( 17 )
مرجيحه يا ايام وبتمرجحنا
تلعبي بينا وتفتحي جراحنا
راحوا الحبايب بعيد وفاتوني
لدنيا غداره نسيت تفرحنا
( 18 )
الصمت عشش والديار خاليه
والحزن مسجون والدموع غاليه
علي حبيب هاجر وكان غادر
كدابه يا دنيا زي الهدوم باليه
( 19 )
يا مركبي يا مسافره لبلاد بعيده
تعبري الحزن وسط الموج وحيده
مشتاق للقا بعد الغياب والبعد
تعالي يا حبيبتي نبني دنيتنا الجديده
( 20 )
قلبي طفل بيدور وسط الزحمه علي امه
تخدوا ف حضنها بعد البعاد وتضمه
سرقوا مني فرحتي ولبست توب الحزن
تعبت م الوحده وقفلت الباب علي همه
( 21 )
اخر كلامي صمت وأوله نوح
وايه يفيد الكلام والصوت مبحوح
صرخه من قلب مات واندفن
جوه الكفن يقول الكلام ويبوح
( 22 )
افرشوا الارض ورود للشعر والشعرا
حررونا من هم السنين ودنيا بتوجعنا
ماتت حروف الشعر وجفت بحوره
ساكن في بيت الحزن والفرح ودعنا
( 23 )
ملاك زارني في منامي زيارة نبي
نزل عليا الوحي وقالي قوم ابتدي
انشر رسالة الحب والغفران
ازاي يكون والشر جوايا مركبي
( 24 )
ارسمي للشمس صورتك والقمر
يلي جمالك نور في عيون البشر
من اي كوكب انتي يا ملاك
بستان من الحسن ع الارض ظهر
( 25 )
اعبري بيا حدودك
اغرسي فيا ورودك
خليني حلم وحقيقه
يلي عمري من وجودك
( 26 )
هاتي ايدك يا حبيبتي وعطريني بعطرها
نيميني جوه عينك وغطيني بنور ضيها
اعبري بيا الطريق انا في حبك غريق
اوعي يوم تنقذيني وغرقيني في بحرها
( 27 )
عارفه حبيبتي ساعات بحس اني ضايع
وامشي في حضن الحواري وليل الشوارع
معايا النجوم وليل الغيوم الف وادور
واهزم هموم وقلبي يكسر كل الموانع
( 28 )
كل ثانيه يزيد الشوق لقربك
رغم كل البعد قلبي يضمك
حاسه بيا يا حبيبتي ولا ناسيه
اني عايش في الحياه بحبك
( 29 )
يا شعر يا سايل من دواية الحبر
اتعقدت المساءله عايزه الحساب والجبر
دستور ومجلس عسكري ورياسه
الخلطه دي محتاجه بس شوية صبر
( 30 )
راسي بتوجعني عايزه حباية صداع
وفنجان قهوه وسيجاره تضيع الاوجاع
وطن بيتسرق والشعب بقي نايم
رحت للسوق لقيت كل القيم تتباع
( 31 )
علميني يا حبيبتي كلمة برود
علميني انسي تعاليم الجدود
اعملك ايه تاني يا مصر
هربت منك وعايش برات الحدود
( 32 )
معرفش ليه فقدت احساس الكلام
انكسر في ايدي القلم وحل الظلام
سافرت الشمس لبلاد بعيده
والليل حلف ما يفارق سما الايام
( 33 )
السواد والحزن عنواني الجديد
لو عايز تجيلي اركب السكه الحديد
واسأل عليا السكه والقضبان
خد قطر بحري او قطر الصعيد
( 34 )
يا مركبي يا مسافره لبلاد بعيده
وسط موج البحر ماشيه وسعيده
اكسري مجداف الألم والحزن
وصليني لشط الحياة والدنيا الجديده
( 35 )
الفرحه ما تكتمل إلا بعد العيد
صومونا سنين وفطارنا لسه بعيد
امتي يا مصر تعودي من تاني
الثوره في الميدان ومجلسنا برضه عنيد
( 36 )
مات الكلام والحرف بقي ناقص
غابوا الحبايب والشعر بقي لايص
يا غايب ومش عارف امتي تعود
تعالي تلاقيني مستني هنا وجالس
( 37 )
هلو الحبايب واحد ورا واحد
اصل الدعا كان لربي الواحد
اكتب انا لمين ومين يكتبلي
الشعر انكتب من واحد عشان واحد
( 38 )
القلب جرحه غويط ملوش اخر
عجز فيه الاطبا وجابوا م الاخر
مسرحيه وشخوصها مهرجين
ابعد يا حب بعيد عني واتاخر
( 39 )
سهران لوش الفجر مستني
صوت النجوم وهيه بتغني
عاشقه حبيبها القمر
تقول للفجر ليه تبعده عني
( 40 )
امسك حرامي سرق البلد
سحل البنت وقتل الولد
لابس افندي بيه محترم
خادم لسيده من يوم ما اتولد
( 41 )
كلام كتير نكتبه مليان بمعاني
مكتوم جوه الصدر ومنه بنعاني
الشعر ايه غير كلمه من شاعر
كتب معانيها وحولوها اغاني
( 42 )
عروسه لابسه طرحتها وفستانها
في الكوشه قاعده يا محلا منظرها
النيل بيجري تحتها والهرم والبرج
عايزه عريس محترم يعرف يقدرها
( 43 )
تعب معانا الشعر وتعبت حروف الكلام
احسن حاجه اعملها اقوم م الفكر انام
السهره كانت جميله والوقت مر سريع
وباقي الكلام ممكن يكمل في حلم منام
( 44 )
مشتاق لكل شارع وكل حاره
وصوت الست وليل السهاري
وقعدت القهوه والشيشه والطاوله
وحشني حضن الميدان وحراره
( 45 )
فقدت في رحلتي ابويا وامي
وانكسر جناح القلب وزاد همي
اليتم المه صعب ومين يتحمل
آه يا زمن العجايب بعدتهم عني
( 46 )
لو الحياة بتنتهي مع بعد احبابنا
كنا هجرنا الكون ونسيتنا ابوابنا
اصل الفراق واللقا من ربي
هوه اللي عالم بحالنا واحوالنا
( 47 )
ليه نوقف عقارب الزمن والساعه
ليه نستعمل ضعفنا في الفشل شماعه
اصرخ قبل ما يموت الكلام
لو فشلت في اختراع بيسموه ولاعه
( 48 )
الحزن مش في اللبس ولون التوب
ولا بوقفة انتظار وساعة غروب
الحزن ساكن هنا في الروح
متعود عليه من بدري ووصلني يدوب
( 49 )
ارمي احزانك ورا ضهرك
قومي اتوضي من دموع طهرك
يا ملاك في عمر البراءه
الفجر شق الغيم صلي بقي ظهرك
( 50 )
الحب حب الروح معجون بطهاره
شركة ومتأسسه مفيهاش ربح ولا خساره
مصنوعه لكل البشر من كل ولون
تعبر طريق الصعب من غير ولا اشاره
( 51 )
الحب حب الله والوطن والاهل
حب لذيذ وجميل وكل ما فيه سهل
ليه نعقد فيه ونزيد في الحكايات
كلنا بنحب النبي وبننعل ابو جهل
( 52 )
الحب انتي وانا وقصه مكتوبه
اسم الجميله مصر واسم الدلع بوبا
بعشق جمال حسنها وحضنها الدافي
احلي بنات الكون شهامه وعروبه
( 53 )
عصفور ع الشجر بيناجي عصفوره
ماسك في ايده ورده جميله مسحوره
هما كانوا اتنين والحب تالتهم
والرابعه صياد برصاصه مغدوره
( 54 )
انزف يا جرح الوطن حكايات
ابكي علي حالي غرقني بالدمعات
ضاع الطريق وضعت انا معاه
آه يا وطن معجون بالهم والازمات
( 55 )
مشتاق لمصر و ليالى الفوضى و العشاق
و تاريخ بيعرف يغازل جغرافية الأشياء
و نهار بيرسم ضحكة ملونه و فرحه
و انا جوه قلبك يا سمره تصدقى مشتاق
( 56 )
القلب سلطان وله مملكه
لا ينفع فيها كلام ولا بكي
مين يملك بأيده قراره
ومين يقدر يمنعه م الحب
ده مملكه
( 57 )
غابوا الحبايب وكان ميعادنا نتقابل هنا
كل يوم بنتظر وكل يوم بيمر يزيد همنا
انتم بخير ولا نسيتوا الميعاد اللي كان
ولا المكان معدش المكان وضاع حبنا
( 58 )
السكه دي مش سكتك
بدل طريقك وغير جزمتك
الحياة مش للطيبين النهارده
روح لبيتك وغير هدمتك
( 59 )
ملعون ابو الاحلام لو مش انا فيها
عايش في سجن الواقع سنين بعانيها
من حقي اعيش وأرتاح زي كل البشر
العمراتسرق مني والفرحه ناسيها
( 60 )
ملعون ابو الاحلام بتخدني من نفسي
دوامه بتشدني في دنيا من رسمي
اصحي علي واقع وغابه وديابه
القي كل الحبايب بتعض في جسمي
( 61 )
يا بلد غابت فيها العداله
ونص شعبك بتأكليه م الزباله
من بواقي العم سام واليهودي
ليه بتعلميني إننا أصل الحضاره
( 62 )
اكتبيني غنوه فوق شفايفك
ازرعيني ورده جوه قلبك
ارسميني صوره ع الجدار
المهم اعيش واموت بقربك
( 63 )
النهارده قلت اخلص من غباوتك
من عمر والشاطر وكل مشاكلك
تسمحي تقبلي مني ورده جوري
وتسقيني بايدك من شهد حلاوتك
( 64 )
ليه كل ما فكر فيكي ببكي
كتر حب ولا خوفي وشكي
غاليه يا مصر وفوق الجميع
الكل بيقطع ف توبك ويشكي
( 65 )
السعاده مش ف الحلم ولا ف الهروب
ولا في كلمه حلوه ف ساعة غروب
عايز احس وانا بقربك بالامان
قلبي تعب يا حبيبتي من سيرة الحروب
( 66 )
في ليل الحلم تسكن الامنيات
وروح تناجي روح بصمت الآهات
تنادي عليها وسط الزحام
يختنق الصوت وهمس السكات
( 67 )
عرفتك حبيبتي من وحي الخيال
رسمتك في عقلي ملكة جمال
وشفتك اميره بخصله وضفيره
وقربك وقربي ده شيء محال
( 68 )
سلاما سلام يا ليل السكون
يا حلمي الجميل وصمت الجنون
يا همس الحياري وليل السهاري
وبيت كل عاشق أين يكون
( 69 )
متجمعة الاحزان و متكاترة
كل القلوب مكسورة من فترة
هى الحياة مش حلوة بالشكل ده
و لا الآسى جوة البشر فطرة
( 70 )
قلبك مسافر لما بعد المستحيل
لساه بيقدر يبتسم لساه جميل
قلبك ملاك خلاك نبى
بس النهار مش عبقرى و الليل طويل
( 71 )
احضني حزن الليالي واعبري المستحيل
البسمه لسه بتتولد وده شيء جميل
ربي خلقنا بشر ورحمته النسيان
دي نعمه منه لنا مهما حزننا يميل
( 72 )
ليه بتسرقي حلاوة دنيتك
يابت هوه الحزن عله ومسكتك
ارمي احزانك وعيشي
ارسمي علي شفايفك بسمتك
( 73 )
مهاجر مهاجر صحيح بس بيكى
و عايش فى حزنك و قلقان عليكى
مهاجر و فاكر جميع الغناوى
مهاجر لحبك من الغربه فيكى
( 74 )
صبح الصباح فتاح يا عليم
مع غنوه حلوه وصوت حليم
كل كلمة حب حلوه قولتهالك
وانتي مالك بحبك والله العظيم
( 75 )
زعلانه ليه يا شمس الصباح
كل شيء تلاقيه عندك مباح
حافظي علي ضحكة عيونك
الضحكه منهم تنسيني الجراح
( 76 )
تعرفي إنك معايا في كل ليله
بحضن الأشواق والذكري الجميله
بصحي من نومي مش لاقيكي
بس صورتك جوه عيني خليله
(77 )
هوه انا عاشق ومش داري
بعشق ملاك م السما ساري
ولا عقلي خلاص ضرب
الوهم ساكن معايا داري
( 78 )
خدني يا ليل الحزن لدولتك
انا عايز اعيش ف نار جنتك
حاسس بالمرار في الحلق
راح الحبيب وسبني لوحدتك
( 79 )
الدنيا زي الارض دواره
كل شيء فيها بقي تجاره
سعر البني ادم فيها صفر
مين يشتريه مني بخساره
( 80 )
حد يصدق في ثوره تقوم
خليط ما بين البصل والتوم
سلطه علي كل شكل ولون
خدها الغريق وسبنا احنا نعوم
( 81 )
هيلا هيلا شد الحيل
قالوا بعد النهار ليل
كفايه يا مجلس فلول
حرام العذاب والويل
( 82 )
خايف علي بكره ميجيش
انام الليل واصحي ملاقيش
غير نفس الوجوه الكريهه
اعلام مزيف وحل مفيش
( 83 )
اهلا وسهلا بالغايب الحاضر
راجع زي القمر ومهاجر
رايح لسما في بلاد بعيده
آآآه منك يا زمن كداب غادر
( 84 )
صباح الخير يانور الصباح
يا شمس الحياة ورحلة كفاح
عايش بحبك وباقي عليكي
تعالي ننادي العمر اللي راح
( 85 )
احلم وخلي الحلم حر ومسافر
سواح في كل الكون ومهاجر
ولما يرجع بعد غربة الايام
ضمه وقول للحقيقه تتاخر
( 86 )
حلمتي والحلم جميل
حلو يا بنت النيل
من بعد خرم ودانك
تعلقي الحلق ده دليل
( 87 )
في شارعنا كان بيعدي الترام
كنا نقعد علي القهوة بأحترام
لما يعدي عم عبده جارنا
كنا نقف له ونعمله تعظيم سلام
( 88 )
يارا ساكنه معايا في نفس العماره
بنت جدعه زي كل بنات الحاره
لما تخرج في اي ساعه واي وقت
كانت عيونا عليها تحميها بجساره
( 89 )
موبايلك علي طول مشغول
لو سبتك انا غير مسئول
ده كلامك مع كل الناس
ومعايا اعذار علي طول
( 90 )
آلووووووووووووووووو ردي يا بنت الناس
لو عامله مش عارفاني روحي افتحي الكراس
تلاقي حروف اسمي فوق الغلاف مكتوب
انا برضه تاج راسك وعمري في يوم منداس
( 91 )
والله تعبت خلاص دايما يا حبيبي مشغول
من لعنة حبك بتعذب وموبايلك دايما مقفول
غيرت الرقم اللي معايا والتاني اديته لمين
اديتك عمري وايامي بتديني القسوه علي طول
( 92 )
آلووو واخيرا اليوم رديت
وسألتك قلت انا بالبيت
طب ايه كان شغلك عني
متكونش عني استغنيت
( 93 )
يلعن ابو الحب وكل اللي منه يكون
مرض خبيث ساكن وداء كبير ملعون
وجع في القلب دايم وكل يوم مهموم
ملعون ابو الحب وكداب يا امل مجنون
( 94 )
حلوه يا بنت الايه غزاله بريه
بيغير منها القمر والشمس مخفيه
انتي يا بت ايه انسيه ولا ملاك
ولا عروسة بحر يا احلي جنيه
( 95 )
راهب انا في حبك وساكن انا في ديره
وهبت ليكي عمري وسرقتي مني خيره
ملعون ابو الايام يوم ما اتحرم منك
وازاي اعيش في يوم حياتي من غيره
( 96 )
كل شيء فوق احتمالي
ارحمي ضعفي وحالي
كوني ليا ام وحبيبه
تكوني ليا زوجتي وحلالي
( 97 )
فكي من ايدي قيودك
حرري اسري بايدك
خليكي معايا مسامحه
واسمحي اعبر حدودك
( 98 )
في وسط الزحمه تتشابه الرؤوس
تلاقي وش ضاحك والتاني عبوس
الكل ف طاحونه غرقان في همه
الناس ماشيه تايهه تقولش ف كابوس
( 99 )
واقفه ليه يا عقارب الزمن
لدغتك سامه ووحدي بدفع التمن
كل ما داوي جرح يتفتح غيره
وانتي سبب جروحي يا
woman
( 100 )
الف وش ومليون قناع
لبساهم حبيبتي يوم الوداع
وضحكه صفرا ع الشفايف
وكلمة مخنوقه وقلب باع
( 101 )
الحروف والسطور بلون غيابك
السواد جوه عيني بيشوف عذابك
يقولك ارحمي قلب عاشق وحسي
يا قلب جاحد والله خساره عتابك
( 102 )
الخيانه طبع ولا جينات ف دمك
اديتك كل عمري وانت اديتني همك
خلاص كل شيء انتهي وراح لحاله
انا مش نبي ولا يسوع عشان اسامحك
( 103 )
عارفه حبيبتي حاسس بأيه
اني نجم ماسك القمر بايديه
طاير بعيد فوق ف السما
وانتي حاسه بلي بحس بيه
( 104 )
لولا وجودك علي حروف الكلام
كنت قفلت صفحتي ودخلت انام
وقلت للشعر روح بعيد عني
محدش فاهم كلامك والله حرام
( 105 )
الوصايا العشر خديهم هديه
احفظيهم دول من نور عنيا
كل كلمه فيهم من قلبي ليكي
يا ملاك نزل من ربي ليا
( 106 )
كل الكلام كتبته فيكي
وانتي انتي مش لقيكي
اعمل ايه تاني حبيبتي
كل شيء عملته ليكي
( 107 )
ممكن اضحك وانا في عز همومي
وتخاصم عيوني الدمع وتموت جفوني
ومين يسأل عني وعن حالي غيري
آه يا دنيا حزينه منكده عاللي خلفوني
( 108 )
خلاص زهقت منك يابت وبقول كده كفايه
المسرحيه خلصت خلاص ووصلنا النهايه
100 سنه معيشاني في كدب وخداع
انتي ايه ما بتتعبي عايزه توديني العنايه
( 109 )
احلي ما فيكي يا مصر انتي
بهرمك ونيلك وشبابك وبنتي
دايما كبيره وفوق الجميع
بحبك يا مصر حتي لو كنتي
( 110 )
يموت الكلام وتبقي انتي عظيمه يا مصر
مع صوت آذان يكبر يوماتي صبح وعصر
واجراس كنايس تدق في سماكي
بحبك مريضه واحبك عفيه ليوم النصر
( 111 )
كل يوم اكتب لوحدي وهاتي
مفيش حد عايز يشاركني آهاتي
فين الشعرا غايبين ليه
خلاص ابطل كتابه واشتغل قرداتي
( 112 )
لجنة انتخابات الرياسه مقموصه
حد يجيب لها طرحه وعروسه
شوية كلاب تابعين للنظام
زعلانين اوي يا لجنة منحوسه
( 113 )
يا عم المشير حوش كلابك
بكره البلد تتظبط وتروح لاحبابك
هناك مكان محجوز لكم
وحياة ابويا خساره بقا عتابك
( 114 )
طره تنادي علي باقي الفلول
عايزه المشير بالعرض او بالطول
باقي م الزمن علي المرواح شهرين
جهز شنطتك وعود معدتك ع الفول
( 115 )
قربت اقفل العياده واشتغل في القهوه
انزل طلبات للزباين من شاي أو قهوه
والبس مريله بيضه واعد مراكي
والمعلم هريدي يجي يضربني علي سهوا
( 116 )
سامحيني يا نفسي لو قلت انا زهقان
الوحده كيسها اتملا خلاص أحزان
مليت الحياة وزهقت منكوا يا ناس
اسقيني يا غربتي من العذاب الوان
( 117 )
لا انا نازل م الفضا ولا غير البشر
انسان بسيط اتولد في زمن انكسر
عاش القرف والويل سابها وراح
ولما قامت ثوره برضه عليها اتحسر
( 118 )
العسكري سرق البلد والثوره
واحنا قاعدين نقوله ولا حوله
مش بالدعا هترجع مصر
ولا بدقن طويله ولا عتاوله
( 119 )
مسكين يا انا عقلي خلاص راح
عايش كده مهيس ماشي انا سواح
مش عارف فين سكتي وخداني
الصح ايه م الغلط الكل عندي مباح
( 120 )
رجعت م الشغل روحت انا علي البيت
لقيت كل حاجه زي ما رحت وجيت
دخلت جوه الوحده وقفلت انا بابي
ملعون ابو الاحزان خلتني ما اتغديت
( 121 )
خديني يا نفسي لعالم الاحلام
خليني اشوف حبيبتي قبل ما انام
يمكن تجيني فحلم ولا كابوس
المهم تيجي حبيبتي وترميلي سلام
( 122 )
ممكن تسمعي مني كلمه اخيره
عايزه ليه ترجعيلي اليوم ذليله
حافظي علي الصوره القديمه
خليكي باقيه في عيني دايما كبيره
( 123 )
لسه بتحبي يابت مكرهتيش
انتي عبيطه ولا مخ مفيش
حب ايه واحنا مش لاقيين
منين اجيبلك وازاي نعيش
( 124 )
مشتاق ليكي وشوقي لمين
تعالي يلا من بعد غيبه سنين
حبنا طفل تايه من غير نسب
انا ابوه والام راحت فين
( 125 )
اخر كلام هكتبه علي صفحتي ديه
لقيت كلامي ملوش معني يا عنيا
بكتب لمين ومين يقرا افكاري
داير في ساقيه متغمي ومكتفه ايديا
( 126 )
دوامه ودايره بتجرنا فيها
كل ما نخرج منها نلاقيها
الام مصر والابن متهان
والعسكري سبب بلاويها
( 127 )
يااااااااااااااااه لو تعرفي بحبك اد ايه
كنتي فرشتي الورد طريق امشي عليه
ونقشتي كفوف الحنه ومنها تسقيني
آلهي تمرضي بحبي والكل يسأل ليه
( 128 )
اخلعي توب البراءة والبسي توب السواد
ارمي احلامك وراكي واعلني اليوم الحداد
عل اللي ماتوا ف العباسيه بعد هجمه عنتريه
من مجلس عسكري وبلطجيه قتلوا فيها الولاد
( 129 )
سافري جوه احلامك
روحي يلا علي امتحانك
خايفه من ايه يا اميره
عايزاني امتحن مكانك
( 130 )
اطلبي من ربك التيسير
الحلم بكره يكون امير
هيه دي خطوة طريقك
والصغير
بكره يكون كبير
( 131 )
امسكي بداية الخيط واغزليه
علي كل لون توب تصنعيه
جوه صندوق الزمن مكانه
المهم تقدري عليه وتشيليه
( 132 )
مسافر اليوم اعمل عمره
وطالب من ربي المبره
عايز اغسل توب ذنوبي
والبس توب المغفره مره
( 133 )
اربع مرات حجيت للبيت الحرام
وزرت قبر النبي وكل اصحابه الكرام
عملت عشرين عمره وطوفت البيت
وكل مره يكون الدمع هوه لغة الكلام
( 134 )
باب السياسه اتخلع يا عم خالد
ورئيسنا جاي من طره وبدم بارد
هاتلي واحد ينفع يزقلي المرجيحه
دول كلهم كانوا شغالين ف موالد
( 135 )
باب الادب صح مصنوع من ورق
الكلمه فيه تقلها من الحديد والعرق
لا يشلها يوم ونش ولا عنتره في زمانه
سهم مصنوع من فولاذ للحق اخترق
( 136 )
زي العسل يابت قبل ما نتهبب
ولا فيكي حاجه ابدا يابت تتعيب
يخرب بيت اللي ما نصحني وقال
ان اسبوع واحد وشعري هيشيب
( 137 )
عارفه بحبك ليه والله مش عارف
يمكن سواد العين منهم انا خايف
ولا جمال الصمت والراحه مطلوبه
او يكون م الحب لبلاويكِ مش شايف
( 138 )
اسرقني يا نوم من احزاني
وشيل الهموم من احلامي
عايز النهارده اكون سعيد
بس الحياه مش رحماني
( 139 )
أجمل مافي الأنسان
إنه يكون انسان
ميغيروش الزمن
ولا تهزمه الأحزان
( 140 )
كيف مات الحب وقد حلمنا بالبقاء
وتعاهدنا أن نكون في الحياة شركاء
أين ترانيم الحب .. أين شدو الغناء
هل ضاع كل شيء من بين أيدينا هباء
( 141 )
أتيت متألقاً بسراب
عاشقاً
يعتليه تاج الاغتراب
يقال انى
أمير
ويقال انى غراب
( 142 )
تعالى اشرب معايا
شايك مع قهوتى
يلى هواك من هوايا
ودنيتك من دنيتى
( 143 )
عايز ابطل شعر وكتابه طول العمر
كل الكلام قلته واحلي ما فيه كان مر
كرهت الشعر وكلامه
حاسس اني مسجون وعايز اكون حر
( 144 )
ام كلثوم الشقيه
ضحكت عليا
سهرتنى الليل بطوله
اكتب الشعر اللى نفسك تسمعيه
( 145 )
ينساب الحب من الاقداح ويهوي امامي
فتفقدت حطام الكأس كي اعرف من كان الرامي
وتوقفت قليلا مرتبكا في اكثر من مشهد دامي
حين علمت بان النبلة كانت تخرج من قوس سهامي
( 146 )
عديت غريب مضطهد و الغنوة غنوة نوح
زى كل الأنبيا متصاب بداء البوح
بص لى نظرة حب يمكن تطهرنى
و الطهر مش فى البدن الطهر طهر الروح
( 147 )
مستغربك حتى القمر والبحر و خطوط الرصيف
مستغرباك الاغنيات طعم الرغيف
مستغرباك اللهفة فى عيون البنات
حتى كلام الحب فى الغربة سخيف
( 148 )
بين السعادة و العذاب فى 1000غنوة
سعات تلاقى فى الزحام نفسك فى خلوة
الفرق بين الجنة ايه و النار
مساحة الاختيار و صبية حلوة
( 149 )
عصفورة جت م القمر تعشقنى كام ساعة
و تحى اللى اتقتل جوايا بشجاعة
بصيت لقيت فى عنيها كل اللى بحلم به
ملعون ابو الاحلام لو تبقى شماعة
( 150 )
أحزن ده حزنك نبى
فى طوفان عنيك مركبى
عدت لجنتها
لقت الملاك اجنبى
( 151 )
يا حبيبتى يا أخر برج مراقبة ف خانة اليك
انا جايلك رغم الحزن و رغم الجرح و رغم الشك
انا جايلك شايل حلم بيحلم بيكى
اتاريكى فى قلبى و قلبى عليه الرك
( 152 )
مش فكرة لو انك جميلة و بعشقك
أو ان لما تحبى قلبى يحن لك
انا بعشقك رغم الزحام والضلمة و الخنقة
وعشان سعات لما يخاف القلب يبص لك
( 153 )
لما الشيطان قال لأ
ربك عطاله الحق
و لا قال ده لازم يعتقل
و لا جه الملايكة ونزلوا دق
( 154 )
دايما يا قلبى بتخسر الاحلام
و الحلم يبدا ورا و ما ينتهيش قدام
علشانك اخضر برئ مرسوم بحنية
و الخير بيكسب بس فى الافلام
( 155 )
قلبك خلاص ح يخططوه
و يجيبو جيش من عندهم و يقسموه
تقدر تهاجر أو تحارب أو توافق
أو تموت و ده up to you
( 156 )
أبدأ لواحدك لأ ما تبدأشى
عدى بعنيك البحر ما تخافشى
تغرق يجوز و تعدى مش معجزة
الفكرة هى ازاى ما تندمشى
( 157 )
القلب مش محتاج سواد أكتر
كلن ما يكبر حلمنا يصغر
ح أفضل معاك و ح أغنى للعشاق
و العشق ما يعرفش خط أحمر
( 158 )
قلبك مسافر لما بعد المستحيل
لساه بيقدر يبتسم لساه جميل
قلبك ملاك خلاك نبى
بس النهار مش عبقرى و الليل طويل
( 159 )
لسه المطر ما غسلش وشك يا غريب
و رافضه بنت الايه تقول انك حبيب
قلبك المليان ضجيج ما بيتسمعش
و كلامك المليان حنين طالع مريب
( 160 )
هناك العشق ما بيحتجش للترتيب
و نور الشعر بيظهر فجأة ويغيب
و تلقى الانبيا واقفين على الناصية
و بنت بترسم الجنه فى كف حبيب
( 161 )
هناك احلام ما جتش لحد بالمرة
تلاقى الشمس عاشقه عنيك و مش حرة
تغرب من شفايفك.... قال
عشان تبقى بلون بشرتك سمرة
( 162 )
راسمك تقوب فوق الجدار
ونهار بيسرح ع المدار
راسمك اغانى طيبة و مطرة و شجر
رسمانى ليه ف لحظة حصار؟؟؟؟؟
( 163 )
لسة السيحارة بتحرقك وقت الكتابة
لسه فنجان قهوتك مليان كآبه
لسة مستنى البشر تبقى بشر
الدنيا مش للشعرا يا ابنى الدنيا غابه
( 164 )
لسه قادرة ترفرفى زى الملاك
و انا قلبى لسه لا راح هنا و لا جه هناك
كل الذنوب متعلقة فى رقابتى انا
و الخوف محاوط بسمتى و حبك هلاك
( 165 )
متجمعة الاحزان و متكاترة
كل القلوب مكسورة من فترة
هى الحياة مش حلوة بالشكل ده
و لا الاسى جوة البشر فطرة
( 166 )
مكتوب يا واد ولا مهوش مكتوب
قلبك يطول البنت و تطولها يا حبوب
او تفترق عنها و تبطل تصدق
ان انت كنت بتتحرق وتدوب
( 167 )
علشان تكون على مستو الموال
بطل تحب و تكره و مشاعر الاطفال
احكم على الدنيا و من غير نرفزة
تلقى يهوذا ويسوع اتنين من الابطال
( 168 )
بثثتُ شكواي فذابَ الجليدُ
وأشفقَ الصخرُ ولان الحديدْ
وقلبُك القاسي على حالهِ
هيهات ! بل قسوتُهُ لي تزيدْ
( 169 )
ياصاحبي خذ للحبيب رسالتي
فعسى يرى بين السطور الأدمعا
بلغه أني في الغرام متيم
والقلب من حد الفراق تصدعا
( 170 )
يلي نويت السفر
احجز مكان ليا
تعبت م الانتظار
والدمعه ف عنيا
مستني طول العمر
لرحله أبديه
( 171 )
بكره اللي جاي افضل
وافضل انا لمين
الخطوه مني بتتقل
ضاعت مني السنين
( 172 )
سنين عمري بتجري
والجري للخايفين
ماتت فروع شجري
والفل والياسمين
( 173 )
ياسمين دي بت حبيتها
من عشر سنين فاتوا
مريت قصاد بيتها
لقيت كل اللي فيه ماتوا
( 174 )
ماتوا شبابنا في التحرير
ومصر مسجونه
عايش حياتي فقير
ومجلسنا ده لمونه
( 175 )
نفسي افهم ليه ده يكون
ضرب وعنف ويقولي اصون
مجلس غبي وبالسلطه مفتون
عايز يخدها ولا يبقي مجنون
( 176 )
منين يجي الوفا والحب والتنهيد
واحنا مكلبشين كلنا ايد بتدبح ايد
مهما نقول الآه صوتنا يروح لبعيد
امتي هيجي الفرح والبس هدوم العيد
( 177 )
لبست بدلة الفرح واستنيت العروسه
مرت سنين وشهور والحلوه محبوسه
بين العذاب والمر مسجونه مغروسه
ناصب انا فرحك تعالي يا عروسه
( 178 )
فته جميله معموله بالثوم
رز ولحمه وتخمه ونوم
كلها جنابه ونام متوول
وساب الشعب فقير محروم
( 179 )
من امتي كان الابن عاصي علي امه
ماسك لها سكين سنه علي مسنه
عايز يبيح دمها ببرود ولا يهمه
خساره فيه الدعا وخساره اكون امه
( 180 )
حياتي كلام ينكتب ف سطور
لا هو منهج دراسي ولا دستور
من يوم ميلادنا لمماتنا
وكل يوم مننا واحد .. عليه الدور
( 181 )
حل خيوط الشعر وأرمي الحروف
من ايه نخاف نقول رغم الظروف
مصر محفوظه وشعبها متصان
حوالين سلامتها من اتباع الخروف
( 182 )
الشعر دمعة حزن محتاجه منديل
يمسحها قبل ما علي الخد تسيل
محتاج للبكا وغير البكا مالي
يا قلبي اصرخ صراخك بكا وعويل
( 183 )
مين يصدق يا مصر اني فيكي ذليل
انا اللي حبيتك وانا اللي بيكي عليل
بصرخ وصرختي بتهز كل الكون
ومين يداويني ومين يشتري المنديل
( 184 )
أحيني ففي الحياةِ أسطورة
وصوتٌ ينادي بحُلمِ الطفولة
فكيف الرحيل وأنت السكن
وأين الملاذُ إذا لم تكن ؟
فقد كنتَ لي أنت أصلٌ وصورة
وقد كنتَ سكني فهل لم أكن ؟
( 185 )
يمكن الحلم اتقتل بس الجبل
لو هده ريح أو حتى مال برضك جبل
و انا مش جبل من طين وقش ولا عضمى هش
إن كان على القلب اللى حبك آخره نعش
و انصِبله بدل الخمسه ألف
و يبقى مات ولا اتخدعش
( 186 )
عيون القلب مفتوحة .. وبتشاهِدْ
تشوف أحلامي مدبوحة .. بتتشاهِدْ
ويصرُخْ بالألم حرفي .. يقول الآااه
تشوفني النّاس وتسمعني .. تقول الله
عشان المعنى جوايا .. مَفَسرّنيشْ
قلوب الخلق ف الآخر .. مافهمتنيشْ
لكن دمع العيون شاهِدّ .. على حالي
وانا مالي ..
( 187 )
ذهبَ الوفاء ذهابَ أمس الذاهب
والناسُ بين مخاتلٍ ومواربِ
يفشون بينهم المودة والصفا
وقلوبهم محشوة ٌ بعقاربِ
( 188 )
اذكريني لو أنتهت للشمس رحلة مع نهار
اذكريني لو صحى للصبح ورد الياسمين
اذكريني لو لمحتي في ليالي البرد نار
واذكريني لو سمعتي للمطر صوت حزين
( 189 )
غمضت عينى يا زمان الامنيات
ولا كنتش اعرف قد ايه انك غريب
واللى اتولد جواك ف لحظه ضاع ومات
كدابه يا كلمة حبيب
كدابه يا لحظة امل
كداب يا معنى نفسى اشوفك مكتمل
( 190 )
كن غني القلب واقنع بالقليل
مُت ولا تطلب معاشاً من لئيم
لا تكن للعيش مجروح الفؤاد
إنما الرزق على الله الكريم
( 191 )
عينى عليك يا زمن بيلفنا شالك
غامق بلون غربتى دايب كما حالك
حابب اوى صرختى !!
يا غريب بأحوالك
( 192 )
ظالمني ليه يا زمن وجوايا خبيتك
كل البشر كرهتك وأنا جيت علي بيتك
تهجرني ليه يا زمن وعمري ما سبيتك
ورتني العذاب ألوان وصبرت وحبيتك
( 193 )
غتيت الزمن بس فيه حبايبنا
وكلمه م القلب تخرج وتسعدنا
ويغدر بينا الزمن أيام ويبعدنا
ويوم يجمعنا تاني ويفرحنا
( 194 )
الليل لما دخل نامت كل العيون
إلا عيون أخوكم رفضت تكون
يمكن أكون وحدي أنا المجنون
ليلي صبح نهار وعيوني بلا جفون
( 195 )
احنا ليه بنلوم زمان ..
أو مكان ؟
ماحنا صُناع كل شىء
يبقى ليه يا ضعفنا
ترتدى زى البرىء
تفتتح للتوهه فينا
الف ميت مليون طريق
( 196 )
عايز تكون لك إيد قوية ؟
و تعيش بدال العمر ميّة ؟
حافظ على .. ضلك عشان
.. الضل حقك في المكان
الضل إثبات الهوية
( 197 )
الشاعر يكتب يقول ايه
والمصيبه حلت عليه
عاجز عن التفكير
وبيسأل كل ده ليه
( 198 )
حاسس ان راسي بقت راسين
وخطوة رجلي تقلت حبتين
ازاي شفيق يوصل للاعاده
والاصوات دي جبها منين
( 199 )
لما الشمس تشرق م المغيب
لما ينجح ف الانتخابات شفيق
بكره نلاقي حسني عن قريب
بيطلعلنا لسانه وسيادة الفريق
( 200 )
انا طلعت النهارده جنازتي
وقدمت من الدنيا اجازتي
لفيت نفسي جوه الكفن
طلقت دنيتي قبل جوازتي
( 201 )
عمرك شفت شعب عايز حد يسوقه
يسحبه من رقبته ويركبله طوقه
انا شفت شعب مصر العجيب
جايب سكينة لشفيق يقطعله عروقه
( 202 )
معدش لينا غير امل فالحاج مرسي
كلنا نقف وراه و نوصله للكرسي
قبل ما يخده اللئيم ابن اللذينه
يركبه للمخلوع تاني يحكم ويرسي
( 203 )
الارض بتلف تحت مني لفتين
الصمت عشش ف النفوخ حبتين
الغضب بركان بيضربني بقوه
حسبي الله في شعب مات مرتين
( 204 )
كل شارع وكل حاره بتدوسها رجلي
بتلعن ابو اللي خلفوني ومنها بجري
تقولي دايس يا كلب علي دم الشهيد
اللي خلاك النهارده ليك صوت وتدي
( 205 )
منين يجي التفاؤل وانا مهزوم
ضهري انكسر وشايل حمل هموم
حاسس اني كبرت مليون سنه
منين يجي الفرح والشهيد مهموم
( 206 )
قالها زمان سيدنا علي
لو كان الفقر رجلا لقتلته
والنهارده يا سيدنا الولي
لو شفيق جه رئيس قبري حفرته
( 207 )
الفلول الفلول ساكنين علي ضهري
شايلهم 30 سنه من فجري لظهري
تعبت من حمل الطريق والمشوار
والله هموت ويدفعوا لتربتي مهري
( 208 )
حتي في حزني عايزين تلوموني
اعملكم ايه اقطع انا هدومي
والناس تقول عليا خلاص اتجنن
شعبي خذلني وخيبلي ظنوني
( 209 )
بليت النهارده شرباتك يا عروسه
صبيت كوبايت الفرح ف الكوشه
ماتت عروستي قبل زفافها بساعات
بدلت شربتها بقهوه ساده مغشوشه
( 210 )
حط صوتك علي صوتي نبقي اتنين
نعدل ميزان الكفه اللي مالت حبتين
لما رحنا كل واحد في سكه غلط
م النهارده سكتنا واحده مش سكتين
( 211 )
خايف عليكي حبيبتي من الديابه
يخدوكي مني علشان احنا غلابه
ملناش ضهر يحمينا ولا سند
وربي شايف عباده وعنده الاستجابه
( 212 )
آآآآآآآآآآه محتاج منك يارب المدد
انت آلهي ومليش غيرك ليا سند
تنصر ثورتنا من بعد غيمه طويله
يرجع فرحنا تاني ونجوز البت للولد
( 213 )
كتبنا كتابنا من 30 سنه
وانتي مستنيه ومستني انا
طالت يا عمري ايام الحداد
بكره حبيبتي جايه ايام الهنا
( 214 )
كنت بخاف زمان اقولك بحبك
مكنتش اقدر غير بس اعاتبك
كان كل شيء حوالينا ماسخ
موافقه تتجوزيني واعيش بقربك
( 215 )
غضبان منك يا شمس الصباح
ازاي عايزه تشرقي واحنا جراح
خلي ليل ايامنا باقي 25 يوم
لما نشيل الغمه او حي علي الكفاح
( 216 )
خلطبيطه عايز يخدها ابن العبيطه
هوه ومجلس العسكر عملوها زيطه
فاكرين امبارح هيكون زي النهارده
نسيوا ان في ثوره غيرت الخريطه
( 217 )
تيجي يا بت تحبيني واحبك ونفرح
بلاش وجع قلب ولا للفكره نشرح
الحكايه مش محتاجه نعقدها خالص
انا بحبك وقاعد وسط الخلق بسرح
( 218 )
ليه كل ما بقف قدام المرايا
بشوف صورتك واقفه ورايا
هوه ده الحب اللي بيقولوا عليه
ولا عقلي خف ومحتاج السرايا
( 219 )
تعرفي يا بت اني بكذب عليكي
وكل كلامي وهم وحياة عنيكي
انا لا بحب ولا عندي حبيبه
بس كلام ونفسي اكون ليكي
( 220 )
خلاص مش هكتب شعر تاني ولا رباعيات
من النهارده اعتبروا ان سمير ذكري ممات
ولما تشتاقوا لكلامي فتشوا عن سطوري
لما كنت فيوم معاكم قبل ما اكون رفات
( 221 )
الجنه مكانها للتايبين
وكل ناسك وعابد سنين
بس باب جنة العشاق
مفتوح لكل اتنين عاشقين
( 222 )
ليه كل شيء بنشوفه بالشقلوب
شفيق نشوفه راجل جدع حبوب
وناس تقول آسفين لرئيسهم المخلوع
وبكره ندفن الشهيد ف محرقة طوب
( 223 )
مفيش امل في مصر طول ما فيها شفيق
وايه العمل يا بشر ونمشي فأي طريق
عمرك شفت شعب اهبل رايح يديلوا صوته
آلهي تولعوا وما تلاقوا حد يطفي الحريق
( 224 )
البحر لما يروح للشط يحكيله
يبل توب العفاف وطرف منديله
والموجه تيجي تحضن الاتنين
تلاقي الرمل علي الشط يشكيله
( 225 )
ماشي بغني علي وتر ربابه وناي
مستني يجي القمر اصله قالي جاي
اللحن رقص كوز الدره وعوده
ولما جه الليل طل القمر وقالي باي
( 226 )
صباح اجمل من صباح المطربه
يوم ما كانت لسه شابه وغريبه
والزمن مكلش منها وشبع
يا اجمل بنات الكون يا طيبه
( 227 )
وصلت للبيت لقيته خاوي علي عرشه
كل شيء فيه بارد من ارضه لفرشه
قفلت بابه علي حزن مالي الحيطان
طار عصفور الامل وراح علي عشه
( 228 )
نفسي اعيش واتمتع مره بحياتي
القي روحي في كازينو بتحب ذاتي
كل السكك متلخبطه ومتشابكه
مفيش جديد والهم ملازمني يوماتي
( 229 )
قوليلي يا نفسي علي فين مسافره
رايحه للقمر ولا للشمس فتره
طول عمرك مهاجره لبلاد بعيده
عيوني تعبانه ومحتاج احط قطره
( 230 )
وقفت قدام صورتك بشوف جمالك
قالتلي بتبصلي ليه كده قلت مالك
كمان عايزه تحرميني من خيالي
نامي جوه نن عيني وروحي لحالك
( 231 )
اكتبي اسمي واحفظيه
من حروفي هتعرفيه
الناس بتندهلي سمير
عايزك انتي بس تندهيه
( 232 )
اعبري بحور المستحيل
واهزمي الليل الطويل
نامي جوه جفن عيني
الصبح طالع زيك جميل
( 233 )
حورية م الجنة نزلت م السما هنا
انا لا صاحب كرامه ولا م الانبيا
انسان مزيج من رحمه وبراءة
اصل جوايا طفل في عمر الصبا
( 234 )
خلص الكلام كله لاء مبيخلص
طول ما القلم والحبر مبينقص
وصفحتك مفتوحه اكتب فيها
لا انا صياد يمام ولا غاوي قنص
( 235 )
خايف انام واتحرم من نور عيونك
ومتجيش في نومي ومشفش نورك
انام في ضلمه ويطلعلي شفيق
خليني صاحي اشيل عنك همومك
( 236 )
سيدتي هل لي من سؤال
ممكن اشوفك في الخيال
ولا ده حلم صعب ومنام
ممكن يكون وممكن محال
( 237 )
عايش حياة صعبه خالص ومتشقلبه
فاقد حنان الحبايب والنفس متغربه
قلبي مات واندفن وعمري شهور
شايل حب فخيالي لطفله شقيه وطيبه
( 238 )
اسمحيلي يا حبيبتي اروح انام
احنا ميعادنا بعد ساعه في المنام
اوعي تخليني استناكي كتير
لو مش فاضيه تيجي ارميلي سلام
( 239 )
جوايا فدان حزن وجسمي مليان شوك
شايلهم علي ضهري ومضايقين الطوق
حاسس بضعف وخايف اوي م الموت
كوابيس واحلام سوده وكلها من فوق
( 240 )
نفسيتي من امبارح زفت وزي الطين
مفيش اوكسجين بيوصل عندي للرئتين
يالله تعبان اوووي ومحدش حاسس بيا
روحي بتطلع ومش عارف رايحه لفين
( 241 )
محتاج في زمن الآلم شيخ يداويني
من علم نوره وقرآن ربي يشفيني
شايل هموم الكون وحدي يا ناس
كل ما اقول خلاص الموت يناديني
( 242 )
الراحه مطلوبه آآآه للقلوب الطيبه
في زمن القسوه فيه حاجه محببه
عند البشر دستور وكتاب مفتوح
زماني خلص وايامي سوده مهببه
( 243 )
مجنون وجناني واخدني دوغري للعباسيه
يكون عندي حظ والاقي عندهم حل ليا
الفرق بين اللي بره واللي جوه الحقيقه
بشر مبتعرفش تكدب قاعده راضيه وهنيه
( 244 )
معرفش عندي احساس اكسر كل حاجه
عندي عنف جوايا وصرخه وجعها زياده
حاسس بدنيا سوده وكل البشر شياطين
بس انا مش نبي وجوايا شياطين ولاده
( 245 )
محتاج طبيب يوقف نزيف وريدي
وجع الحياة والناس صعب يا سيدي
الحزن مركبه ماشيه وسط دوامه
عماله تغرقني محتاجك تاخد بايدي
( 246 )
حبيني او متحبنيش ده ميهمنيش
لا انتي اخر حبيبه ولا بعدك مفيش
طول ما النبض بيدق جوه القلب
بكره اقابل واحده تحبني متجرحنيش
( 247 )
اجري ورا طريق احلامك
وخلي حبل الامل قدامك
الحياه زي الزمن غداره
ارمي جوه زبالتها احزانك
( 248 )
القساوه دي جينات في طبعك
حاولت انسي عشان اسامحك
وامشي تاني فسكتك من جديد
لقيت قلبي قاسي وعايز يعاتبك
( 249 )
بتعرفي تضحكي يا بت وتخدعي قلبي
نهيتي انتي المسأله ورفضتي قربي
خليكي علي راحتك يا حلوه
بكره تندمي وتقولي الذنب كان ذنبي
( 250 )
واقفه علي شباك البيت وفارده شعرها
ام العيون السود الورد نايم علي خدها
لمحت بطرف عيني خجل العيون السود
حسدت شباك بيتها وقلت يا بخت اهلها
( 251 )
كل الطرق مقفوله إلا طريق قلبي
اشارته خضرا والكل منها بيعدي
ولما تكون حمرا والطريق مقفول
تعدي انتي براحتك والرجل بتهدي
( 252 )
كل الصفات فيا حلوه ومقبوله
بس المشكله في الحب لسه سنه اولي
خجول وبغرق في شبر ميه
ولما شافوني الناس قالوا معقوله
( 253 )
شاعر وبكتب شعر فالحب والحكايات
ولما حبيت بنت وعملت ابن ذوات
راحت وفاتتني معرفش برضه ليه
بس اللي انا اعرفه خايب مع الستات
( 254 )
لما تشوف الشعر وتقرا كلماتي
تقول ده واد حبيب صايع وفلاتي
مقطع السمكه وديلها ورامي الراس
الحقيقه غير كده والله يا مولاتي
( 255 )
زهقااااااااااااااان من كل حاجه حواليا
الشمس بتطلع فليلي وعيوني مغميه
كل شيء شايفه اسود بلون الزفت
حتي النهار طالع علي ارض منسيه
( 256 )
كرهت كل شيء شايفه وكرهني
الارض قالت خليك بلون حسني
قلتلها ما انتي سوده وكئيبه
قالتلي غير نظرتك تسجد وهتبوسني
( 257 )
كلمت نفسي كتير ونفسي كلمتني
لا يوم ضحكت لها ولا يوم ضحكتلي
خصامي معاها طال من الف سنه
لما انت كاره نفسك ازاي هتشوفني
( 258 )
شايل هموم الزمن وماشي بطوح
تاه الطريق مني ومعرفت انا اروح
خبطت علي بيبان الزمن والايام
رد عليا النهار وقالي اقعد هنا و نوح
( 259 )
يا بحر يا ابو العجايب والجنيات
عروسه فيك ساكنه كلها حسنات
نزلت يوم لبحرك خدتها مني
طول عمري كاره ميتك بالذات
( 260 )
قرصان انا وراكب وسط موجه مجنونه
شيلاني من شط لشط وعيونها محزونه
سألها يوم الرمل ليه انتي في مد وجزر
قالتلوه ما لقيت شط ولا رمله عليا حنونه
( 261 )
تعبت م الحكايات والشعر كله مواجع
حتي حروف الكلام تعبت وبتنازع
والحزن اللي جوايا راسخ هنا راسخ
هتعمل ايه يا سمير تسكت وتتراجع
( 262 )
مليونيه مليونيه والمجموع قرب علي ميه
والميدان بكره مليان ووقعوا كل الحراميه
يلا يا واد وانتي يا بت سيبوا النت
روحوا بسرعه علي الميدان ونادوا حريه
( 263 )
ام الشهيد وقفت تنادي علي ابنها
عايزاه يرجع تاني يصون عرضها
اصل بلادنا رجالتها جالها عقم
لما ضاع حق الشهيد وكمان حقها
( 264 )
دوري يا ساقيه بينا ولفي كمان
حسني بكره يخرجوه من الليمان
ونلاقي في الاعاده مرسي وجمال
الناس تنتخبه تاني وتديله الامان
( 265 )
اخلعي يا حلوه يلا حجابك
شفيق جاي يحكم بلادك
وحلف بحق هبل واللات
يقفل الجوامع ويمنع صلاتك
( 266 )
لما ابنك يسألك عملت ايه بثورتك
والشباب اللي مات عشان حضرتك
ترد عليه وتقوله ايه وقتها
العسكري خدها وطار وفاتلك وكستك
( 267 )
يا اهل مصر الكرام هذا بيان
اذيعه عليكم قبل ما يفوت الأوان
خلوا بالكم من الاعلام المزيف
عايز يبيعكم تاني لحرامية الليمان
( 268 )
تحت رجلي زلزال وبركان غضب
لما مات الحق والقضا منه اغتصب
برأ كل حراميه وكلاب النظام
واحنا شايفنا بقر ولا عيدان حطب
( 269 )
بتحبني ايوه بحبك
الذنب ذنبي مش ذنبك
يا احلي بنات الكون
حلوه ويصونك ربك
( 270 )
عاشق انا خطوتك وماشي وراها
وفين ما ترسي مركبك ارسي معاها
صدق اللي قال الحب حلو ومرار
حبك يا بت خد روحي مني وصباها
( 271 )
ارسمي الحزن طريق واعبريه
امشي فوق المستحيل واوصليه
خلي كل شيء عادي وطبيعي
انتي شابه وبكره حلو هتلاقيه
( 272 )
تعرفي اسمك بحبه عشان جميل
لما انطقه بحس قلبي نسمة عليل
اسم نازل م السما يا ملاكي
اسم خلاني احبه رغم انك مستحيل
( 273 )
نفسي اصرخ وسط البشر
اقول بحبك يا اجمل قمر
الحب عمره ما كان معصيه
مرض و في الجسم انتشر
( 274 )
ليالي الشتا بارده وقاسيه
زي حب لحبيبه ناسيه
انها مينا قلوب العاشقين
ومركبي ع الشط راسيه
( 275 )
كل امورك يا حبيبتي ملخبطه
هوه حب ولا لوحه مشخبطه
مرسوم عليها مليون لون ولون
حبك زي طفل غاوي شعبطه
( 276 )
ارسمي حزنك مدينه كبيره
تلقي كل حاجه قدامك حقيره
البشر علي كل شكل ولون
والدنيا دي تلاقيها صغيره
( 277 )
ليه بنهرب كلنا م المسئوليه
ونرمي ورانا الخيبه القويه
هيه مصر دي ملك مين
شعبها ولا عصابه مفتريه
( 278 )
الثوره قامت من جديد
هيكون هناك الف شهيد
يجددوا دم اللي راحوا
يكون صيام من بعده عيد
( 279 )
قاعده علي شط الترعة و بتغسل
نزلت في بحرها وعملت بستهبل
رمتني برمش عيون غزلاني
قمر يا ناس نازل م السما يهبل
( 280 )
كل حرامية البلد خلاص بطلوا سرقه
ولما جيت احسبها لقيتها مش فارقه
قلت اسرق كمان زيهم وبعدها اتوب
ولما نويت الحج راحت المركبه غارقه
( 281 )
في حاجات ممكن نوصلها وحاجات لاء
وحاجات بتمشي وحاجات محتاجه زق
كل مره نحاول والمحاوله تدوم
اصل الحياة زي مسمار ماشي بالدق
( 282 )
آآآه يا بلد زي تورته محشيه عقارب
شمسها تشرق من الغرب والكل غايب
شعب قام بثورة علشان يطرد نظام
ادا صوته لشفيق مسطول ده ولا شارب
( 283 )
زهقت من كل شيء بيحصل قلت ابعد
رحت هناك بعيد وقلت مع نفسي اقعد
مليش دعوه بمشاكل مصر واهلها
لقيتني شايل الهم من غير ما اقصد
( 284 )
عدي كل السكك بكره توصلي
الطريق معروف اوعي تتأخري
امشي في طريق مستقيم
هتلاقي لونه جميل ومخملي
( 285 )
لولا انتي بتمري علي بابي
وتيجي تخبطي حتي في غيابي
كان زمانه مات من الوحده
وضاع جمال دنيتي وزاد عذابي
( 286 )
ساعات بيجيلي اوقات شعور سخيف
بشوف الدنيا صيف واحنا ف خريف
الاقي الدنيا بتمطر ثلوج وورود
اقوم من نومي حران اشغل التكييف
( 287 )
حاسبي علي قلبي دوستي عليه
خطوتك زلزلت نبضه وكل ما فيه
غزاله يا بت شارده في زمن غدار
تاه كل الكلام معاها وفقدت معانيه
( 288 )
ليه نفوس البشر بقت كده متغيره
الصبح متبسمه وبالليل متحجره
يقابلوك بضحكه من ورا القلب
صفرا بلون الفحم وعيون مدوره
( 289 )
علمونا زمان في المدرسه العلم نور
كل ما اجي افتح كتاب الاقي الف سور
كهربا مقطوعه وطلبات كتيره للبيت
وبنت الجيران في الليل قمر مسحور
( 290 )
اسرقي من الزمن الف ضحكه
الحياة هيه ايه غير بس رحله
مسافرين فيها وراجعين تاني
عسل يا بنت الايه واحلي نحله
( 291 )
بيقولوا عني عاشق والقلب خالي
زي جذع شجرة ميت وخاوي
حاضن في قلبي ميت موال حب
والف خساره يا قلب عاشق غناوي
( 292 )
سافرت ولفيت نص الكره الارضيه
وقابلت مليون بنت حلوه وصبيه
عمري ما حبيت ولا غرني جمالهم
لما رجعت مصر عشقت بنت مصريه
( 293 )
الحب قصه بسمعها في الحكايات
حظي منيل بنيله دايما مع الستات
قلبي تقولش حجر مزروع بشوك
مليان بحور ومدن مفيهاش بنات
( 294 )
ممكن تيجي تسكني قفصي الصدري
افرشه ليكي من دمي وانفاس رئتي
ولما تحبي ترقصي اسمعي دقاته
علي موجة الشريان قناة الأورطي
( 295 )
حبيبتي حبك بيجري في دمي
بشوفك نسخه جميله من امي
حنانك نهر شريانه من القلب
بيصب عندي ويغسل كل همي
( 296 )
عيد ميلادي فاضل عليه شهر
كل ما افتكره يجي لقلبي قهر
الناس المتخلفه بتحتفل بيه
سنه دفعتها من عمري للحياه مهر
( 297 )
لما يدخل الليل في حضن شمس النهار
الدنيا تنور شعاع اسود تحت الحصار
والناس رايحه تنتخب رئيسها الجديد
تجيب فل من الفلول بعد سنين انتظار
( 298 )
اشتريلي من عمري لحظة سعاده
دفعيني فيها كنوز الارض وزياده
كل عمري عشته علي الهامش
ضاع العمر كله والباقي ليا العياده
( 299 )
عايز تكون شيء او متكونش
تمشي في سكتك ولا متكملش
هوه مشوار وانكتب عليك تمشيه
يا توصل لآخره يوم يا متوصلش
( 300 )
اركب جزمتك وخلي ايدك المجداف
واسبح في نهر الحياة واوعي تخاف
الدنيا عايزه السباع مش الأرانب
لو مش هتحسب خطوتك شد اللحاف
( 301 )
ادلعي يا دنيا عليا وارقصي
عماله ليه تغرقيني وتغطسي
الارض تحتي مايله زي الزمن
لما ابعد تيجي ورايا وتقرصي
( 302 )
يا حبيبتي ربي ما يحرمني منك
تكوني جنبي وافضل كمان جنبك
هيه الحياة من غيرك تبقي حياة
عايز اعيش عمري وحدي احبك
( 303 )
احساس جميل انك تلاقي الحبايب معاك
في لحظة انتظار تتمني وصول الملاك
متعرفش ميعادها ولا امتي هتيجي
شعور جميل تلاقي الحبيب فجأة وياك
( 304 )
ساعات بتتمني حاجات ومش بتلاقيها
وتمشي لسكة غلط تخدك خطوتك فيها
متعرفش ترجع إلا بعد طلوع الروح
ولما ترجع تدور علي الحبايب وتناديها
( 305 )
حبك جميل زي جمال عيونك
ساعة بتخيل شكلهم وجفونك
بحضن جمال نظرتهم وانام
محلا جمالك ورده علي عودك
( 306 )
الحياة في مصر احوالها زفت وطين
اللي فاكرانهم ملايكه طلعوا شياطين
والسياسة ملخبطه ومتلعبكه خالص
ولقالوا لاء تايهين زي اللي قالوا آمين
( 307 )
كل يوم بنام واصحي علي صوتك
بلبل في دنيا الغنا واللحن من بيتك
عايش في جنه مليانه ملايكه وحور
نفسي افضل هنا وميجيش يوم وافوتك
( 308 )
مشيت وسط صحرا تايه انا وحدي
فقدت سكة طريقي والكل فات بعدي
امتي اوصل ومنين اجيب الطريق
بعد سكة الحبايب ايه باقي هنا عندي
( 309 )
ليه بحب ارجع اقرا كل كلمه بينا
ليه بشوفك في كل سطر وكل كلمه
اسمه ايه حب ولا جنون وعشق
ولا شوق عين لعين ونظره حلوه
( 310 )
حطوني تحت الحصار وقالولي احب
قلت ازاي وانا عاشق والعشق ذنب
قالوا مين هيه واسمها ايه لو جد
قلت اسمها ر ... وساكنه جوه القلب
( 311 )
بسم الله خليها علي طرف لسانك
ابدأي بيها ليلك وشمس نهارك
سبحان الله وبحمده سبحان الله العظيم
كلمات جميله اقريها قبل منامك
( 312 )
عاشق انا سكك الحواري والشوارع
حاضن انا مصر بفرحها و المواجع
مشتاق للكورنيش وحمص الشام
وحبيبه تكون في انتظاري وانا راجع
( 313 )
فين ما بتروحي ماشي وراكي
زي طفل متشعلق بأمه ليلاتي
خايف يوم تروحي ومترجعيش
وازاي اعيش وانتي كل حياتي
( 314 )
ايوه انا بحبك وايه المشكله
حبي عار ولا حاجه مكعبله
لو مش عايزاني انتي احبك
انتي حره تكرهيني وأنا ليا ربنا
