2024-02-19, 12:15 pm
من طرف 
الشوارع ليه بترقص
تحت رجل المحرومين
والسما دموعها تنزف
ع اللي ناموا مظلومين
عشت عمري خارج حدودك
حر وفحبك سجين
واحنا مين
اكسري كل الحواجز
خلي فجر الشمس طالع
يهزم الليل الحزين
ارسمي الضحكه البريئة
انفضي هم السنين
خايفه ليه
وانتي نيلك شريان بيجري
في حلوق العطشانين
انتي طول عمرك قويه
من عهد مينا للمخلوعين
المرض عارض وصابك
واحنا بيكي مهمومين
مانتي طول عمرك عفيه
وارضك السمرا قويه
وعودك الصلب متين
كل محنه تمري بيها
احنا منها ضعفانين
والحزن اللي جواكي ساكن
صرخه مليانه آنين
ارجعي تاني ولمي
شعبك الحر الأمين
احتوي ولادك وضمي
احنا من غيرك يا أمي
بردانين
اعبري شمس الظلام
وسط بحر المطحونين
واوصلي لشط الامان
تلقي حبات الرمال
مشتاقين
ارجعي يا مصر تاني
تعبت م الشوق والحنين
مهما قلت إني بحبك
يفضل الحب جنين
انتي يا مصر عارفه
اني عاشق
وعشقي ليكي
نور عيوني المعصوبين
samir
