2024-02-19, 12:15 pm
من طرف 
كنا هنا في نفس الميدان
علماني
أو ليبرالي
سلفي أو اخوان
النهارده انقسمنا تاني ليه
الكل لسه بيغمض عنيه
بس ليه
شعب جايع لسه بيدور في الزبالة ع الرغيف
شعب نايم في العرا أو ع الرصيف
كل يوم بتسمعوه كلام سخيف
بتفطروه عيش مصنوع من تراب
وتشربوه من كاس مر الشراب
والعتاب
على مين العتاب
على حمدين
ولا البرادعي
ولا موسى
ولا مرسي
كلهم زفت وهباب
طماعين
كذابين
بياعين وهم وسراب
للرياسه طمعانين
مش مهم احنا مين
لسه عايشين ولا ميتين
المهم يخدوا هما الحكم الطماعين
يموت اسلام ولا جيكا
مش مهم
يموت الشعب كله
مش مهم
الأهم
كرسي مصنوع من خشب جوه قصر الرياسه
مش خيبه دي برضه ووكاسه
لما كل يوم يموت شهيد
لما ام ابنها يرحل بعيد
والوليد
عهد اسود من غير معالم
حد عالم
بكره جاي شكله ايه
عيش مفيش
شغل مفيش
جواز مفيش
والبديل بانجو وحشيش
يعني ننسطل ونعيش في وهم
وألف سهم
يترشق جوه قلب كل مصري شريف
لسه عايش ع الأمل حر ونظيف
عايز يعيش
عايز في بكره يتولد يلاقي الرغيف
حد حاسس ولا فاهم أي حاجه
م احنا لسه بيدسونا بالبياده
والبلاده
اننا لسه عايزين نعيش
لسه ماسكين في الأمل وبدلة شاويش
طمعانين نحقق حلم مات
نصحى منه ومنلقيش
غير بلد اتقسم شعبها وكله مفيش
واللي باقي اني انام ومتصحنيش
يمكن يكون الحلم اجمل وأعرف اعيش
samir
