مشتاق ارجع لبلدي بعد سنين الغربه
تضمني في حضنها الدافي
والأهل والصحبه
للناس الطيبه والوجوه السمحه
ولما اموت تكون ارضها التربه
والاقي ناس تترحم على قبري
لا هيه كانت ف الحياة تعرفني
ولا تعرف أنا مين
ولا ايه اصلي
كل اللي تعرفه عني
إن أندفن هنا مواطن مصري
هيه دي مصر اللي أنا اعرفها
هوه ده عُرفها وهيه دي ناسها
مصر اللي شربت من نيلها
ونمت على ارضها
تحت ظلال خيرها
مصر الجميله بلون سمرة ولادها
مين اللي غير لون بشرتي وغيرها
فين مصر الطيبه الحنونه
مين خلاكي يا مصر مجنونه
مين اللي خلاكي يا مصر
متعطشه للدم شعنونه
فين مصر الطيبه
مصر اللي فين متروح
تتمد ليك ايادي حنونه
مصر اللي فيها الشرف
والبنت فيها مصونه
ايه اللي غير شعبها
وتركيبها
ازاي سمحنا للعدو
يلعب ويخربها
مين اللي صنفنا مله ودين
يلعن ابو اللي خلانا
كده دمويين
انا مش بحاسب حد
ولا بلوم على مين
اللوم على الشيطان
اللي حكمنا سنين
صنفنا مسلم مسيحي
ونسي أننا كلنا
فالأصل بني آدمين
ربي خلقنا بشر
مش مجموعة حمير
يقولنا نهس ... نهس
يقولنا حا ... نسير
يبقى ليه نعيب على الاخوان
ولا ع السلفيين
كلنا يا أهل مصر
مكتوب في شهادة ميلادنا
اننا مصريين
بس بقول لمين
ومين هنا سامعين
خلاص قفلنا عقولنا
وبقينا بفكرنا غايبين
امتى يارب نفوء
والله يا مصر حزين
نفسي يا مصر ارجع
والاقي تاني مصر
سكانها مصريين
Samir