2024-02-19, 12:15 pm
من طرف 
( 315 )
ساعات بشوفك جوه افلام الدراماقصة حب جميله نهايتها استحاله
انتي بطلة القصة وانا المؤلف
والزمن مخرج الاحداث والروايه
( 316 )
خليني زي حلم جميل في احلامك
ارسميني خط وامشي عليه فأيامك
شوفيني شمس او قمر او كابوس
المهم اكون عايش بحروف كلامك
( 317 )
الحب ملوش عمر ولا ميعاد
ميعرفش اسم مروه او سعاد
كتاب مكتوب علي كل القلوب
يوم ما يجي بيخلي ليالينا سهاد
( 318 )
ليه عايزه تفهميني ان حبي معصيه
وان ذنبي اكبر من احتمال كل الانبيا
انا بشر ربي خلقني من ميه وطين
مستكتره علي قلبي يحبك يا ....
( 319 )
زي شعاع جميل من ضوء قمر
دخلتي قلب مات واتحول حجر
رجعتي فيه من تاني الروح
خليتي ايامي جنه وليلي سمر
( 320 )
علي شط بحر الحياة بعزف انا همي
صياد ورامي شبكته في بحر من دمي
اصطاد منه اوجاع عايشها سنين
طلعتلي عروس البحر فرحانه بتغني
( 321 )
كل ايام الحياة مليانه كاسات فرح وهم
تدينا السعاده مره ومرات تسقينا هيه الغم
الغريب ان ايامها ماشيه طبيعي زي الفل
تقولش البشر اتعودت تشرب منها السم
( 322 )
اصبر يا صبر علي صبر صبري
وادفني يا حزن حزني جوه قبري
الضحكه ضحكة قلب ماتت ضحكته
لما ليل الليل دخل علي ليل فجري
( 323 )
عطرني يا عطر بعطور من عطرها
جميله وجمالها من جمال حسنها
قمر منور في ليلة ليلها قمر
طالع وطلعته طالعه من نور ضيها
( 324 )
بحبك وحبك حب ولا حب لحن لغنوه
عاشق ومعشوق والعشق للعشق كلمه
عايش وحيد ووحدتي تعبت من الوحده
انتي الحياة وحياتي من حياتك حلوه
( 325 )
مصر ولاده وولادها احرار
ولازم بكره نكمل المشوار
مليونيات في كل الميادين
رسالة م الثوار بكره للحمار
( 326 )
شايل همك يا مصر والحل ايه
عايزين يسرقوكي مني ولاد الايه
ساقيه ودايره بينا واحنا مكممين
عمالين يزهقونا وقلنا نصبر عليه
( 327 )
سهران لوعد السما مستني
قاعد و معايا عودي وبغني
يا ليل يا عين تعبك السهر
ومين يشيل الحزن يوم عني
( 328 )
فكرتني ليالي الغربه بايامك يا مصر
وقعدت القهوه من الصبح لحد العصر
وبنت حلوه تعدي تهز الارض تحتها
ترقص قلوب ملهاش عدد ولا حصر
( 329 )
من بعد اسمك مفيش تاني اسماء
كل حروف اللغة بتخلص والكل سواء
من اسم ناديه لسناء او هالة وسهام
طعم الحروف يختلف والعشق اصله داء
( 330 )
انا مش حبر علي صفحتك بيسيل
ولا انسان كان عاجز عن التعبير
دخلت فيوم لمملكتك
وقلت اطير
صنعت لنفسي اجنحة من التفكير
كتبت الشعر في حبك
وفي حبك صبحت اسير
( 331 )
عايشه فخيالي وساكنه ببالي
بنادي عليكي واقولك تعالي
سمعتي ندايا يا اجمل حبيبه
ممكن تحني وتسبيني في حالي
( 332 )
قلبي اللي عشقك بينادي عليكي
يقولك تعالى وهاتي ايديكي
نعدي يا عمري طريق المستحيل
ونرحل سوا من بحر عنيكي
( 333 )
يا دنيا الهموم والذل والتهميش
كل البشر فيكي اتعلموا التنتيش
واكل لحم البشر بقا ليهم غيه
والله انا بكرهك وغصب عني بعيش
( 334 )
مشتاق ليكي يا مصر والليل والعشاق
وبنت حلوه جميله بتغازل الاشواق
وقعدة القهوة والطاوله والشيشه
والله يا مصر في الغربه انا مشتاق
( 335 )
نزلت بحر الهوى اصطاد انا منه
رميت فيه الشبك واصطدت انا همه
سألت رمل الشط والموجه
قالولي روح يا واد امشي بعيد عنه
( 336 )
العشق زي الموت قدر ومكتوب
مهما هقول واعيد كل الكلام مرغوب
يابت اصل الحب ده مرض وصابني
رغم عذاب المه برضه يكون محبوب
( 337 )
كل يوم بيمر حبك فقلبي يزيد
ماشي جوه الدم وجوه كل وريد
الحب ده مملكه
وقلبي فيها ساعي بريد
( 338 )
كل شيء في الحب جميل
بس انك تحب وحبيبك لسه بخيل
تتوه في وسط الزحام
وترجع من سكة الحب تاني ذليل
( 339 )
حبيبتي زي فصول السنه
مره تسقيني المر ومره الهنا
ومره تمنع عني الكاس
وتسبني لوحدي عطشان أنا
( 340 )
سافر يا قلبي لمدينة قلبها
واسكن هناك فيها وعندها
يمكن تحس بيك في يوم
وتعرف ان سمير عاشق حبها
( 341 )
لحظة وجودك بحس بسعاده
وشوقي يزيد زياده زياده
غيابك ولع في قلبي حريق
خلا ناره ورشة حداده
( 342 )
اجمل ما في الحياة انك تلاقي حبيبه
وقلبك يدق لو كانت بعيده ولا قريبه
ولما تجمعكم يوم الليالي
تنسى معاها كل الليالي العصيبه
( 343 )
اتمنيت ردك وانتي السليبه
لقلب احبك ومنه القريبه
تمر الليالي وانتي هناك
لماذا الجفاء وانتي الحبيبه ؟
( 344 )
عايز كلمه واحده بس منك
تحني على قلبي اللي حبك
وعايش ينادي ليلاتي عليكي
يقولك تعالي وربي عايزك
( 345 )
ببعتلك من قلبي اجمل سلام
في صبحي وليلي وقبل المنام
مع نبض قلبي وشوقي اليكي
رساله يحملها ليكي الحمام
( 346 )
عشقتك بقلبي وكل كياني
ويمكن ف حبي ليكي اناني
عايزك لدنيا اكون وحدي فيها
ومن شهدي اسقيكي كل حناني
( 347 )
شوقي اليكي جنون جنون
وانتي الملاك الجميل الحنون
اسافر ليالي في صمت الخيال
وادور عليكي في ليل السكون
( 348 )
مسافر معاكي لبعد المستحيل
فوق سحابه بيضا وليلها الجميل
نقطف نجوم ونحضن قمر
وتسقيني من كفوفك ماء سلسبيل
( 349 )
كل الطيور بتحبك والشمس والقمر
حتى ثواني الساعات وليل السهر
بس حبي ليكي غير الجميع
لأني بحبك حب غير كل البشر
( 350 )
كتبت كلام اتمنى يوصل لقلبك
ويجي يوم تتهني بحبك
ولو مر يوم من غير وجودك
كفايه اني عايش الليالي بقربك
( 351 )
رجعت من العياده شايل انا همومي
على شماعة الأحزان علقت انا هدومي
سألني باب الهم امتى تكون مبسوط
ومنين تيجي السعاده في سما غيومي
( 352 )
مشتاق ليكي شوق السما للأرض
تحضن ترابها هيه بالطول والعرض
من بعد غيبه طويله وليل مشتاق
راجع لمحرابك اصلي فيه كام فرض
( 353 )
حبك جميل يا بت زي القمر
مسافر معايا في ليل السهر
خلاني خاصمت النوم والناس
حبك يا احلا ملاك اجمل قدر
( 354 )
محسوده من كل الزهور و الناس
يا اجمل من الياقوت والالماس
تسلمي من كل شر وسوء
يا اميرة الحب وملكة الاحساس
( 355 )
بكره اللى جاى بيطير
على جناح عصافير
جايب معاه الامل
قنطار محبه وخير
( 356 )
تعالى اشرب معايا
شايك مع قهوتى
يالى هواك من هوايا
ودنيتك دنيتى
( 357 )
يا أم العيون وساع
جلبى فى عشقك ضاع
لا كنت يوليوس قيصر
ولا حصلت بتاع
( 358 )
يا ام العيون جارحين
جوليلى متَّى وفين
نتلاقى يا حبيبتى
ويدوب جُليبى حنين
( 359 )
يام عيون جارحين
جوليلى جاعده فين
وانا هاخد صلاح سالم
واخش م البساتين
( 360 )
الشعر طاقه نور
مابين خيوط عنكبوت
الشعر شجره توت
الشعر صوت الحق جوانا
يعلى ويعلى
مهما وطوا الصوت
( 361 )
الشعر ف الحالتين واقف بيتكلم
يضحك ف ساعه فرح
وضحكته تعلم
يبكى ف ساعه حزن
جواه ويتألم
يصبر كما ايوب
ولاعمره حيسلم
( 362 )
انا شاب لكن عمرى ولا ألف عام
شفت ياما مرار وشفت ياما ألام
خايف لكن خوفى اصبح اسد
اخرسني لكن بعد ما تعبت كلام
( 363 )
سهران لوحدك هنا وسايبنى سهران هناك
وانا اللى تحت الشيش واقف وبستناك
فتح الجميل درفة الشباك وحدفلى ياسمينه
وقالى يالا بقى ورينى عرض قفاك
( 364 )
احلى ما فى الدنيا راحتك
بعد التعب والمعافره
بتبقى مبسوط وراضى
حتى لو الدنيا كافره
( 365 )
شاهد على قبر الحياه
إن احنا مدفونين جواه
ما تقنعنيش بغير كده
مين شايف حياته .. حياه ؟؟
( 366 )
في نفس المحطه ونفس القِطار
ونفس الادان اللي ساعت فطار
فطر بابتسامه وعلم علامه
وغمض عيونه لآخر النهار
( 367 )
تعبت م الوحده وعيشة الغربه
قلبي مليان هموم وألف سهم وحربه
الوقت ياما بيمر عليا بلون الفحم
نفسي تضميني يا أمي بحق عضم التربه
( 368 )
غابوا الحبايب وكل يوم نقول راجعين
يارب ما يطول غيابهم ويرجعوا سالمين
القهوة من غيرهم زي بيت مهجور
يا طير يا طاير في السما بلغهم تحية العاشقين
( 369 )
وعا الماشي
بسلم عا لّي ناسينا
ولا فاكر
ولاجاشي
معادنا لكن هقول سهوه
وانا مستني عا القهوه
ومش ماشي
ومش ماشي
( 370 )
يا بلد مفكيش إلا قلوب من حجر
كل اللي فيكي خلاص النهارده فجر
لا قانون بيحمي ولا احترام موجود
آآآآآه يا بلد نايمه وشعب كله غجر
( 371 )
يا شعب فين ابتسامتك
وفين ضميرك وهيبتك
الأرض لابسه السواد
وأنت مزوّد ف عِندك
( 372 )
يا قهوتنا يا جامعة الكل على فنجان
نغيب عنك ونرجع لك بشوق ولهان
ونتكلم كلام ع الفاضي والمليان
وادام لمتنا ما بتنقصّ ما يهمش
هنتقابل ونتكلم
ولو على بامية وبدنجان
( 373 )
القهوة فاتحه حضنها للكل
بس القمر زي ما بيغيب بيهل
قاعد انا علي ترابيزه مستني
ترجعوا تاني اصل قربت امل
( 374 )
واموت في جلدي بدون سبب
وبدون حساب
الحق ليه بطعم انسحاب
( 375 )
عدي يا مركبي وسط الزحام والناس
ادخلي بيوت الغلابه واسقيهم حلاوة الكاس
صحي ضماير نامت من الف سنه
دوامه عايشين فيها والكل ماشي محتاس
samir
