2024-09-26, 9:48 am
من طرف ما يخصكيش
ما يخصكيش إنى أسافر
ولا يقولو انه هجر
او تأشيراتى تملا جوازات
السفر
ما يخصكيش انى الرفيق
مانت قطعالى الطريق
وكوبرى ودك أتكسر
ونسفتى مابنا الممر
ما يخصكيش إنى أبات
فى الموانى والجمارك
ولا ادوق الغربه مر
ولا اسيب الأرض
واسكن فى صحارى القمر
ما يخصكيش انى ارتاد البارات
مابين سكارى وعا ..برات
او مشرد فى الحارات
ولا اعانى برد ومطر
او أكون واحد خطر
كل ده مايخصكيش
خلاص بقى مابقتيش
لما قلبك دخله الهكر
واتمسح منه الحنان
حتى ذكرى يوم ماحب
اتنسى ومافتكر
مايخصكيش إنى أهدد
عمرى مارجع للمحاوله
او اجدد
أسحبى الجنسيه منى
أبعدى منى وعنى
مش هعاتب مين غدر
ولا اقول انه قدر
مايخصكيش إنى أحكم
من بدايتك كنتى قاسيه
يوم ماكنا احنا احنا
كنت عايش جوه محنه
لما افكرك إنى بحبك
تقولى اااه كنت ناسيه
اشعر إنى بتحسر
يظهر اللى كان مابنا
اعتبرتيه وجهة نظر
وانه تافه
ومش اكتر من لحظة سمر
بقلم
سليمان دياب
مجلة متخصصة في الشعر والخواطر والفنون
أهلا وسهلا بك زائرنا الكريم, أنت لم تقم بتسجيل الدخول بعد! يشرفنا أن تقوم بالدخول أو التسجيل إذا رغبت بالمشاركة في المنتدى
لا يوجد حالياً أي تعليق