كنت فاكر .بقلم الشاعر/ محمد علي النقلي

كُنتْ فاكر ..
كُنتْ فاكرإن اللي بينَّا .. شئ كبير
واللي جمَّع يوم مابينَّا .. عُمرْ ومصير
كُنتْ فاكرإنه حُب .. غير أى حُب
يقدر يعدي أى صعب .. وفوق كل صعب
ولا شئ هايقدر
ف يوم ويكْسَر .. حلمي الكبير
حلم و حِلمْتُّه 
من يوم ماشُفتُّه .. وانا ليه أسير
كُنتْ فاكرإن اللي بينَّا .. حاجات كتير
كُنتْ فاكرإن الزمان .. صِفي وصالحني
بعتلي قلب مليان حنان .. وبيه سامحني
كُنتْ فاكرإنه قلب .. غير أى قلب
أتاريه بيْخَلَّص مني ذنب .. بلا أى ذنب
دخل حياتي 
خدْ مني ذاتي .. من غير ضمير
وكل اللي خدتُه 
خيانتُه وقساوتُه .. وخداع كبير
كُنتْ فاكرإن اللي بينَّا .. حاجات كتير
لا كُنتْ فاكر إن حلمي .. مالوش تمنْ
أو ييجي يوم ويبقى ندمي .. هو التمنْ
ولا كُنتْ فاكر إن عيون بريئه .. ممكن تخون
وإن الخيانه بقت جريئه .. وبقالها ..عيون
عيون تسيح 
بدموع تماسيح .. وماليها نظير
وإكْمني عاشق 
باعتبرُه صادق .. من غير تفكير
لا كان تفكيري 
ده يبقى مصيري .. أو دي المقادير
لأ .. كنت فاكر إن اللي بينَّا .. حاجات كتير
بقلم
 محمدعلي النقلي