2024-09-26, 9:48 am
من طرف 
عارف نفسى
من ديوان مملكة الخيال
عارف نفسى ..
مش رح تدّى الحب لواحد .. مابيديش
رح تستنى العمر التانى
واللّى عشانه وهوّا عشانى
لو هايجينى .. أو مايجيش
حضن القلب الطيب .. غالى
نجم وعالى
واللى معاكى مابيكفيش
رحلة وصعب عليكى سفرها
قصة انكتبت ..
للى هايمسح .. دمع بطلها
شمس الحاضر .. مش هاتوافق
يبقى وجودك ..
زى غيامة فى وسط نهارها
والأوقات الجايه بتصرخ
كل أملها تحس غيابك
بحر دموعك ..
مش هايغرق مركب سابك
والأشواك اللى زرعتيها ..
أغلى هدية هاأقدمهالك
وبقولهالك :
لمى حبالك ..
أنا متكتف بالحرية
مش هاتفيدك .. مدّت إيدك
خفّى شويّه
أنا مش هوّا اللى بتستنى يقرّب .. ليكى
دوّرى يمكن .. بره حدودى
تلقى اللعبة اللى تسليكى
دانا لو جبتى الشمس ف كفّى
مش هاتكفّى
مش هاسمحلك .. تحتلّينى
أنا نحيتك .. عن أشعارى
وعن دواوينى
لسه القلم الكحلى معايا
واللى مدوّن ..
كل حكاية قديمة تخصّك
وف مدرستك ..
كل ما فيّا اتعلم يفهم ..
قسوة طبعك
حوشى صوابعك ..
هاتعلم فى التوب الصافى
مغرورة وإحساسك حافى
معجونة بمية أنانية
غدارة بدرجة مثالية
فكرانى لأحضانك هارجع ؟
أفكارك كلها وهميّة
دا السحر الإسود .. فكّيته
والبحر الميّت .. عدّيته
سلطانك وقعت مملكته
والصنم الأكبر هديته
بعد اللى اديتهولك عمرى ..
مااخسر عمرى ..
وارجع اصدّق .. كدب مساوى
واشرب من أحزان الدنيا ..
كأنّى الغاوى
يكفى غناوى
وابعدى عنّى
أصل انا واقف هنا مستنّى
مش هايحرك شوقى الريح
ولا هايزغلل عينى الضحك .. أو التفاريح
ولا عنقودك ..
ولا تفاحك ..
ولا هاتعلّق تحت جناحك
ليلك عندى .. كإنه صباحك
سيبك من أيام اندبحت ..
واترحّمت عليها كتير
كل بيبان الماضى اتقفلت
والمستقبل ..
لازم يخضع .. للتغيير
كبر الريش اللى على جناحى
آسف جدا ..
لازم اطير !
محمد درويش
لا يوجد حالياً أي تعليق